ಗೋವಾ ರಾಜ್ಯಕ್ಕೆ ಮೂರನೇಯ ಜಿಲ್ಲೆಯಾಗಿದೆ ಕೆಪೆ ಸೇರ್ಪಡೆ

ಗೋವಾ : ರಾಜ್ಯದಲ್ಲಿ ಮೂರನೇ ಜಿಲ್ಲೆ ರಚಿಸುವುದಾಗಿ ಮುಖ್ಯಮಂತ್ರಿ ಪ್ರಮೋದ ಸಾವಂತ್ ಮಂಗಳವಾರ ಅಧಿಕೃತವಾಗಿ ಘೋಷಿಸಿದ್ದಾರೆ. ಈ ಹೊಸ ಜಿಲ್ಲೆಯ ಮುಖ್ಯಾಲಯ ಕೆಪೆ (Quepem) ಯಲ್ಲಿರಲಿದೆ. ದಕ್ಷಿಣ ಗೋವಾಕ್ಕೆ ಸೇರಿರುವ ಸಾಂಗೆಂ, ಧಾರಬಾಂದೋಡಾ, ಕೆಪೆ ಮತ್ತು ಕಣಕೋಣ ಎಂಬ ನಾಲ್ಕು ಹಿಂಭಾಗದ ತಾಲ್ಲೂಕುಗಳನ್ನು ಒಳಗೊಂಡು ಮೂರನೇ ಜಿಲ್ಲೆ ರೂಪುಗೊಳ್ಳಲಿದೆ.

ಪ್ರಸ್ತುತ ಗೋವಾಕ್ಕೆ ಉತ್ತರ ಗೋವಾ ಮತ್ತು ದಕ್ಷಿಣ ಗೋವಾ ಎಂಬ ಎರಡು ಜಿಲ್ಲೆಗಳಿವೆ. ಈ ವರ್ಷದ ಜುಲೈ ತಿಂಗಳಲ್ಲಿ ಗೋವಾ ಸಚಿವ ಸಂಪುಟ ಮೂರನೇ ಜಿಲ್ಲೆ ರಚನೆಗೆ ಸಂಬಂಧಿಸಿದ ಪ್ರಸ್ತಾವನೆಗೆ ಅನುಮೋದನೆ ನೀಡಿತ್ತು. ನಂತರ ಈ ವಿಷಯವನ್ನು ವಿಧಾನಸಭೆಯಲ್ಲಿಯೂ ಚರ್ಚಿಸಲಾಗಿದೆ ಎಂದು ಮುಖ್ಯಮಂತ್ರಿ ತಿಳಿಸಿದ್ದಾರೆ.

ಮಂಗಳವಾರ ವಿರೋಧ ಪಕ್ಷಗಳ ಶಾಸಕರನ್ನೂ ಒಳಗೊಂಡಂತೆ ಹಲವು ರಾಜಕೀಯ ನಾಯಕರೊಂದಿಗೆ ಸಭೆ ನಡೆಸಿದ ಮುಖ್ಯಮಂತ್ರಿ ಸಾವಂತ್, ಆಡಳಿತ ಜನರ ಮನೆಬಾಗಿಲಿಗೆ ತಲುಪುವಂತೆ ಚಿಕ್ಕ ಜಿಲ್ಲೆಗಳು ಅಗತ್ಯ ಎಂಬುದು ನೀತಿ ಆಯೋಗದ ಶಿಫಾರಸು ಎಂದು ಹೇಳಿದರು. ಮೂರನೇ ಜಿಲ್ಲೆಯ ಮೂಲಕ ಆಡಳಿತ ವ್ಯವಸ್ಥೆ ಇನ್ನಷ್ಟು ಪರಿಣಾಮಕಾರಿಯಾಗಲಿದೆ ಹಾಗೂ ಹೆಚ್ಚಿನ ಜನರಿಗೆ ಸರ್ಕಾರದ ಯೋಜನೆಗಳ ಲಾಭ ತಲುಪಲಿದೆ ಎಂಬ ವಿಶ್ವಾಸವನ್ನು ಅವರು ವ್ಯಕ್ತಪಡಿಸಿದರು.

“ಧಾರಬಾಂದೋಡಾ, ಕೆಪೆ, ಸಾಂಗೆಂ ಮತ್ತು ಕಣಕೋಣ ತಾಲ್ಲೂಕುಗಳನ್ನು ಒಳಗೊಂಡ ಹೊಸ ಜಿಲ್ಲೆ ರಚಿಸುವ ಪ್ರಸ್ತಾವ ಬಂದಿತ್ತು. ಎಲ್ಲಾ ರಾಜಕೀಯ ಪಕ್ಷಗಳೊಂದಿಗೆ ಚರ್ಚಿಸಿದ ಬಳಿಕ ಮೂರನೇ ಜಿಲ್ಲೆ ರಚಿಸಲು ತೀರ್ಮಾನಿಸಲಾಗಿದೆ. ಇದರ ಮುಖ್ಯಾಲಯ ಕೆಪೆಯಲ್ಲೇ ಇರಲಿದೆ,” ಎಂದು ಮುಖ್ಯಮಂತ್ರಿ ಹೇಳಿದರು.

ಇದಕ್ಕೂ ಮೊದಲು, ನವೆಂಬರ್ 2023ರಲ್ಲಿ, ಗೋವಾ ಸರ್ಕಾರ ಮುಖ್ಯ ಕಾರ್ಯದರ್ಶಿಗಳ ನೇತೃತ್ವದ ಏಳು ಸದಸ್ಯರ ಸಮಿತಿಯನ್ನು ರಚಿಸಿ ಮೂರನೇ ಜಿಲ್ಲೆಯ ಅಗತ್ಯತೆ, ಹೆಚ್ಚುತ್ತಿರುವ ಜನಸಂಖ್ಯೆ ಹಾಗೂ ಸಮಗ್ರ ಅಭಿವೃದ್ಧಿಯ ಅವಶ್ಯಕತೆಯನ್ನು ಅಧ್ಯಯನ ಮಾಡಿಸಿತ್ತು. ಸಮಿತಿಯ ವರದಿಯ ಆಧಾರದಲ್ಲೇ ಸರ್ಕಾರ ಮುಂದಿನ ಹೆಜ್ಜೆ ಇಟ್ಟಿದೆ.

ಪ್ರಸ್ತುತ ತಾಲ್ಲೂಕು ಹಂಚಿಕೆ

ಉತ್ತರ ಗೋವಾ: ಬಾರ್ಡೇಜ್, ತಿಸ್ವಾಡಿ, ಪೆರ್ನೆಂ, ಬಿಚೋಲಿಂ, ಸತ್ತಾರಿ (5)

ದಕ್ಷಿಣ ಗೋವಾ: ಪೋಂಡಾ, ಮೋರ್ಮುಗಾವ್, ಸಾಲ್ಸೆಟ್, ಸಾಂಗೆಂ, ಧಾರಬಾಂದೋಡಾ, ಕೆಪೆ, ಕಣಕೋಣ (7)

ಮೂರನೇ ಜಿಲ್ಲೆ ಜಾರಿಗೆ ಬಂದ ಬಳಿಕ ಆಡಳಿತ ಸುಧಾರಣೆ, ಸೇವೆಗಳ ವೇಗ ಮತ್ತು ಅಭಿವೃದ್ಧಿ ಕಾರ್ಯಗಳಿಗೆ ಹೊಸ ದಿಕ್ಕು ಸಿಗಲಿದೆ ಎಂಬ ನಿರೀಕ್ಷೆ ವ್ಯಕ್ತವಾಗಿದೆ.